Şu gün Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onda hormatly Prezidentimiziň Amerikanyň Birleşen Ştatlaryna amala aşyrjak iş saparyn görülýän taýýarlyk barada hasabat berildi.
“Watan” habarlar gepleşiginde bellenilip geçilişi ýaly, Ministrler Kabinetiniň Başlygynyň orunbasary, daşary işler ministri Raşid Meredow hasabatynda häzirki wagtda Amerikanyň Birleşen Ştatlarynyň Prezidenti Donald Trampyň çakylygy esasynda döwlet Baştutanymyzyň Waşington şäherine ýokary derejedäki ikitaraplaýyn duşuşygy geçirmek we “Merkezi Aziýa – ABŞ” sammitine gatnaşmak maksady bilen boljak iş saparyna taýýarlyk görülýär.
Hormatly Prezidentimiz hasabaty diňläp, Türkmenistan bilen Amerikanyň Birleşen Ştatlarynyň arasyndaky gatnaşyklaryň ýokary derejede ösdürilýändigini belledi.
Amerikada geçiriljek sammit bolsa, ýurtlarymyzyň arasyndaky özara bähbitli hyzmatdaşlygy berkitmäge ýardam eder diýip, döwlet Baştutanymyz aýtdy.
Ozal hem habar berşimiz ýaly, Amerikanyň Birleşen Ştatlarynyň Prezidenti Donald Tramp Türkmenistanyň Prezidenti Serdar Berdimuhamedowy şu ýylyň 6-njy noýabrynda Waşingtonda boljak “Merkezi Aziýa – ABŞ” sammitine gatnaşmaga çagyrypdy.
